2-القطة اتدبحت

مستكة وحبهان قصة مليئة بالالحان تتجمع لتعزف لحن واحد لحن حياة عصرية اسف قصدي لحن حياة عصيرية الاتنين بيعصروا في بعض والحياة بتعصر فيهم قررنا نجيبلكم العصير ده وانتو تشوفوه يا تشربوه يا ترموه


الحلقة الثانية ( القطة اتدبحت) من مذكرات حبهان

بعد فضيحة الكشري بقيت مسخرة الشغل الكل بيتريق عليا في اللي يقول لصاحبه مالك كدهمكشرليه ؟ يجاوبو اصل واكل كشري ويضحكو واللي يقولي ايه اخبار عتريس؟ واللي يقولي جهزت الطلب المخصوص بتاع المدير ويضحك المهم ده كله ربى عندي عقدة الكشري اسمع كلمة كشري تلاقي وشي عامل زي دقة الكشري لحد ما سموني كشري افندي وهنا بقى قررت الانتقام ومفيش انتقام من مستكة غير اني ارجعها واعلمها الادب وفعلا رحت ويا ريتني ما رحت

حبهان: ازيك يا حماتي فين حبيبتي؟
الحاجة قرفة( ام مستكة) : حبك برص جعان ويوديك الموريستان ايه ياااض اللي جايبه معاك ده داخل علينا بعلبة كشري ياماجاب الغراب

حبهان: حيلك يا تانت مش هو ده الكشري اللي بنتك خلت اصحابي يطفحوه وبسببها بقيت انا مسخة في الشغل هي اللي غلطانة

الحاجة قرفة: هي اللي غلطانة يا نضاغ اللبانة يا ابو وش زي البرنجانة ياللي الدبور لو شافك يقولك هشي يا زنانة

حبهان : مش كده يا تانت انا جاي وعايز اخلص الموضوع ده احضرنا يا اونكل زعتر

زعتر( والد مستكة): اقول ايه بس ربنا على المفتري اعمل ايه في اللي قارفني وقال اسمه قرفة

نظرة حادة من قرفة تخلي زعتر يجري جوة

حبهان: بصي يا قرفة اصل تانت مش نافعة معاكي كلمة مش هاتنيها بنتك يا تيجي معايا يا مش عايزها تاني
قرفة : حوش يا حواش خوفتني يا واد بص من الاخر علشان بنتي ترجعلك يبقى لازم.................. وكمان..........
وفضلت اسمع في طلباتها ومطنش وفي سري قلت كله مش مهم مادام في الاخر هي هترجع معايا ويتقفل علينا باب واربيها
كنت فاكر ان مستكة زي ما سبتها البنت الهادية الطيبة اللي حبيتها مكنتش اعرف انها اخدت كورس مكثف من الحاجة قرفة يا ريتني ما انطسيت في نظري ورجعتها من هناك عارفين ايه اللي حصل

تاني يوم صحيت من النوم على صوت زعيق

مستكة: اخرسي يا لمامة يا زبالة يا لومان يا دودة يقرف منها ابو قردان

الجارة: سوفاج
مستكة : انا يتقالي سوهاج يا زفتى يا عزبة الزرايب يا كفر ابوجاموس ياللي الحمار يشوفك يقول انا جمبك طاووس
هنا بقى قررت اتدخل قلت احوش

حبهان : هو في ايه؟

مستكة: تعرف قطة الست دي؟

حبهان: ايوة القطة الرومي الحلوة المربربة مالها؟

مستكة : حلوة ومربربة؟انت بتعاكس القطة قدامي ليه مش مالية عينك مش بعيد تكون بتبصبص لعصفورة جيراننا اللي تحت ولا ماشي مع سحلفة الناس اللي فوق
حبهان: ايه اللي بتقوليه ده ايه الفضايح دي ؟

مستكة : طيب خلينا في موضوعنا وبعدين حسابك معايا القطة بتاعت الست دي دخلت شقتنا وخطفت حتة اللحمة اللي كنت هاطفحهالك فرحت دبحاها
حبهان: دبحتي القطة يا مستكة؟

وبصيت على الارض لقيت راس المسكينة في ناحية وجسمها في ناحية عرفت ان الموضوع مش حتة اللحمة اللي خطفتها الموضوع اكبر من كده
بصيت في الارضوبصيت على مستكة لمحت في عنيها نظرة تحدي وفهمت الرسالة وعرفت ان الايام الجاية هتبقى اسود من شعر مستكة بعد ما تحطله جاز

الدروس المستفادة:
1- اوعى تعزم صحابك لان غالبا العزومة دي هتنتهي بفضيحة يا اما مراتك مش بتعرف تطبخ يا اما هتحرجك قدام الناس
2- مافيهاش حاجة اذا صحيت الصبح بدري علشان تجيب الخضار
3- اوعي تروح مراتك عند مامتها ولا حتى تخليها تزورها ولا حتي تمشي في شارع بيت مامتها لانها مش هترجع زي ما سبتها ابدا




اخر حاجة ليا طلب صغنون عندك ممكن تخلي عندك دم وتساعدني في غسل الاطباق اللي جوة اصل مراتي كانت عازمة كل صحباتها النهاردة وعيب اخليها تسيب صحباتها وتغسل او تحضر الاكل



البائس


المعذب


المغلوب على امره



حبهان